அஜய் மல்ஜோத்ராவின் பின்னணி என்ன, வெளிநாட்டுக்குத் தப்பி ஓடிய அஜய் மல்ஹோத்ராவைக் கண்டுபிடிக்க முடிந்ததா, ரஜினியால் மும்பையைச் சுத்தப்படுத்த முடிந்ததா, இல்லையா என்பதுதான் ‘தர்பார்’ படத்தின் திரைக்கதை.
‘துப்பாக்கி’ படத்துக்குப் பிறகு மீண்டும் மும்பை கதைக் களத்துக்கு வந்திருக்கிறார் இயக்குநர் ஏ.ஆர். முருகதாஸ். மும்பையில் நடக்கும் சட்ட விரோத காரியங்களைக் கதைகளமாக்கி, அவற்றை துடைத்தெறியும் வீரதீர போலீஸை கதாநாயகனாக்கி ரஜினி ரசிகர்களைத் திருப்திபடுத்த இயக்குநர் முயற்சி செய்திருக்கிறார். தன்னுடைய இயக்க பாணியிலிருந்து விலகி, முழுக்க முழுக்க ரஜினி ரசிகர்கள் விரும்பும் ஒரு படமாகவே ‘தர்பா’ரை இயக்கியிருக்கிறார் முருகதாஸ். ரஜினியை எப்படி காட்டினால், அவருடைய ரசிகர்கள் விரும்புவார்கள் என்பதையெல்லாம் யோசித்து காட்டியிருக்கிறார்.
சுமார் இரண்டே முக்கால் நீளமுள்ள படம் முழுவதுமே நீக்கமற நிறைந்திருக்கிறார் ரஜினி. மும்பை போலீஸ் கமிஷனராக வரும், ரஜினியின் ஸ்டைலும் மேனரிசமும் கவர்கிறது. போலீஸ் கமிஷனராக அதிரடியாக ரவுடிகளை என்கவுன்டர் செய்வது, மகளிடம் பாசத்தில் உருகுவது, நயன்தாராவுடன் ரொமான்ஸ் செய்ய முயற்சிப்பது, யோகிபாபுவை கலாய்ப்பது முதல் பாதியில் ரஜினி ஒவ்வொரு ஃபிரேமிலும் கவர்கிறார். போலீஸ் அதிகாரி நீண்ட முடியோடும் தாடியோடும் இருக்கக் கூடாது என்ற நியதிக்கு மாறாகப் படம் எடுக்கப்பட்டுள்ளது. அந்தக் கேள்வி வந்துவிடக் கூடாது என்பதற்காக வசனத்தை வைத்து நியாயம் சேர்க்கிறார் இயக்குநர்.முதல் பாதி வேகமான திரைக்கதையால் தடதடவென நகர்ந்து செல்கிறது. அதற்கு ரஜினியின் கலகலப்பும் அவரது இயல்பான சுறுசுறுப்பும் காட்சிகளை விறுவிறுப்பாக நகர்த்துகின்றன. சிறையில் ஆள்மாறாட்டம் செய்து வெளிநாடு செல்லும் வில்லனை ரஜினி ஹாண்டில் செய்யும் காட்சிகளில் இயக்குநர் முருகதாஸ் பளிச்சென தெரிகிறார். ரஜினியை அழகாகக் காட்டுவதில் படக்குழுவின் உழைப்பு தெரிகிறது. ரஜினியும் வயது பார்க்காமல்
தன்னுடைய வழக்கமான துரித சாகசத்தைக் காட்டியிருக்கிறார். ‘நம்புறவனுக்கு வயசுங்கறது ஒரு நம்பர்’ என்ற வசனம் அதற்காகவும் ரசிகர்களைத் திருப்திப்படுத்துமே இயக்குநர் வைத்திருக்கிறார்.
ரஜினி படத்தில் யதார்த்துக்கும் லாஜிக்கிற்கும் இடமில்லை என்றாலும், ‘ஒரு நியாயம் வேணாமா’ என்ற கணக்காக காட்சிகள் வந்து நம்மை சோதிக்கின்றன. மும்பை போலீஸ் கமிஷனராக வரும் ரஜினி, கான்ஸ்டபிள் செய்யும் வேலையிலிருந்து டிஜிபி செய்யும் எல்லா வேலை வரை எல்லாவற்றையும் செய்கிறார். முதல் பாதியின் முடிவில் எழும் திருப்பம், இரண்டாம் பாதியில் சுவாரசியமாகப் படத்தைக் கொண்டு சென்றிருக்க வேண்டும். ஆனால், பின் பாதி திரைக்கதை இழுவையாக மாறி சோதித்துவிடுகிறது. முக்கிய வில்லன் இரண்டாம் பாதியில் அறிமுகமாவதும், அவருக்குக் கொடுக்கும் பில்டப் புஷ் ஆகிப்போவதும் திரைக்கதையின் பலவீனத்தைக் காட்டுகிறது.
வயதான ரஜினியைத் திருமணம் செய்ய நயன்தாரா விரும்புகிறார் என்று சொல்லும் அளவுக்கு அவர்கள் இடையே காட்சியை இயக்குநர் வைக்க மறந்துவிடுகிறார். என்றாலும், நயன்தாரா விருப்பத்தை ரஜினியிடம் சொல்லி, அதை சூசகமாக மறுக்கும் ஸ்ரீமன் சம்பந்தப்பட்ட ஒரே யதார்த்த காட்சியை இந்தப் படத்தில் வைத்ததற்காக இயக்குநரைப் பாராட்டலாம். கமிஷனரை இடமாற்றம் செய்யும் டெல்லி உள்துறை அதிகாரிக்கே சவால் விடுவது, மனித உரிமை ஆணைய அதிகாரியை மிரட்டுவது, இண்டர்போல் செய்யும் வேலையை மும்பையிலிருந்து ரஜினியே செய்வது என டஜன் கணக்கில் படமெங்கும் பூச்சுற்றல்கள் வருகின்றன.
படத்தின் இரண்டாம் பாகம் எப்படி போகும் என்பதை முதல் பாகத்திலேயே சில காட்சிகளின் மூலம் இயக்குநர் ஊகிக்க வைத்துவிடுவதால், அடுத்தடுத்த காட்சிகளை பார்வையாளர்களே ஊகிக்க முடிவது திரைக்கதையின் பெரும் ஓட்டை.
ரஜினியைத் தாண்டி இந்தப் படத்தில் அவருடைய மகளாக வரும் நிவேதா கவர்கிறார். அப்பாவை விட்டுக்கொடுக்காதது, அப்பாவுக்காக ஒரு துணையைத் தேடுவது, தனக்கு நேர்ந்ததை நினைத்து ஒற்றைக் கண்ணில் கண்ணீர் வழிய நிலைகுலைந்துபோவது, மருத்துவமனையில் சிகிச்சையில் இருக்கும் அப்பாவின் மீது பாசமாய்ப் படுத்துக்கொள்வது என கதாபாத்திரத்தின் நோக்கத்தை நிறைவேற்றுகிறார்.லில்லி என்ற கதாபாத்திரத்தில் நயன்தாராவும் படத்தில் அவ்வப்போது வந்து செல்கிறார். ஒரு வரி ஜோக்கில் அவ்வப்போது சிக்ஸர் விளாசி யோகிபாபு ரசிக்க வைக்கிறார். சுனில் ஷெட்டியை வில்லனாக பெரிய பில்டப் கொடுத்து கடைசியில் அவரை
காமெடியன் ரேஞ்சிக்கு ஆக்கிவிடுகிறார்கள். அனிருத்தின் இசையில் இரண்டு பாடல்களும் கும்மாளம் போட வைக்கின்றன. அனிருத்தின் பின்னணி இசையில் காது சவ்வுகள் கிழிந்துவிடுகின்றன. சந்தோஷ் சிவனின் ஒளிப்பதிவில் குறையில்லை.
ரஜினியை மாஸாகவும் அழகாகவும் காட்ட இயக்குநர் மெனக்கெட்டதை திரைக்கதையிலும் கொஞ்சம் காட்டியிருந்தால் ‘தர்பார்’ இன்னும் ‘ஜோர்’ராக இருந்திருக்கும்.
மதிப்பெண்: 2.5 / 5
No comments:
Post a Comment